Ökumaður enn á gjörgæsludeild

Karlmaður sem fluttur var á gjörgæsludeild Landspítala-Háskólasjúkrahús eftir bílslys, við bæinn Breiðumýri í Reykjadal í gærkvöldi, liggur enn á gjörgæsludeild. Maðurinn er mikið brotinn og gekkst undir fjölda aðgerða í nótt. Ekki er talið að hann sé með höfuðskaða og er líðan hans eftir atvikum. Að sögn vakthafandi læknis á gjörgæsludeild er hugsanlegt að hann verði útskrifaður af deildinni á morgun.

Tveir fólksbílar lentu saman og klippa þurfti manninn, sem var ökumaður annars bílsins, út úr bíl sínum en aðra sakaði ekki. Nokkur hálka var á veginum þegar slysið varð. Sjúkrabíll sótti manninn frá Akureyri og fór með hann að Stórutjörn þar sem þyrla Landhelgisgæslunnar sótti hann.