Ég er betri en Thierry Henry

Didier Drogba, leikmaður Chelsea, segist eiga skilið að njóta meiri virðingar á knattspyrnuvellinum og heldur því fram að hann sé betri leikmaður en Thierry Henry hjá Arsenal.

"Ég er í raun og veru betri leikmaður en Thierry Henry, sérstaklega á þessu tímabili," sagði Drogba í samtali við Daily Mirror en hann lét þessi orð falla í kjölfar þess að hann var lægra skrifaður í nýútkomnum tölvuleik.

Drogba segir að koma Andriy Shevchenko til Chelsea hafi gert það að verkum að hann sjálfur fái nú meira pláss til að athafna sig á vellinum. "Það er Andriy að þakka að ég fæ nú meira pláss í sókninni og hann skilur leikinn mjög vel og skapar fyrir félaga sína, sem um leið skapar mikil vandamál fyrir andstæðinga okkar," sagði Fílstrendingurinn.