65 umferðaróhöpp í Reykjavík um helgina

Sextíu og fimm umferðaróhöpp voru tilkynnt til lögreglunnar í Reykjavík um helgina. Flest þeirra voru minniháttar en í aðeins einu tilviki þurfti að flytja slasaðan með sjúkrabíl. Fram kemur á vef lögreglunnar að í átta tilfellum hafi menn stungið af frá vettvangi óhappsins. Þá voru sjö teknir fyrir að aka gegn rauðu ljósi og allmargir stöðvaðir fyrir hraðakstur, þar af tólf á meira en 100 km hraða. Tólf voru teknir fyrir ölvunarakstur og þá stöðvaði lögreglan för tveggja ökumanna sem höfðu þegar verið sviptir ökuleyfi. Þá var einn ökumaður tekinn til viðbótar en sá hafði aldrei öðlast ökuréttindi.