Fox gegn YouTube

Bandaríska kvikmyndafyrirtækið 20th Century Fox hefur farið fram á að stjórnendur netveitunnar YouTube gefi upp nafn manns sem hlóð tólf þáttum af teiknimyndaseríunni Simpsons og fjórum fyrstu þáttum úr nýjustu þáttaröðinni 24 inn á veituna sem gerði netverjum kleift að horfa á þættina án endurgjalds.

Fyrsti þátturinn af 24 birtist á YouTube áður en hann var frumsýndur í sjónvarpi í Bandaríkjunum fyrir um hálfum mánuði og því er talið fremur líklegt að hinn grunaði, sem gengur undir nafninu ECOtotal í netheimum, starfi annað hvort hjá Fox eða sé einn þeirra blaðamanna sem fengu eintak í hendur áður en sýningar hófust.

Sömu þættir birtust sömuleiðis á netveitunni LiveDigital en undir öðru notandaheiti. Þættirnir hafa verið fjarlægðir af báðum stöðum.

Þetta er ekki í fyrsta sinn sem 20th Century Fox fer gegn YouTube með þessum hætti. Eitt kærumál liggur á borði yfirvalda vestanhafs þar sem kvikmynda-fyrirtækið krefst þess að netveitan nafngreini þann sem setti þátt úr teiknimyndaseríunni Family Guy á netið áður en hann var frumsýndur í sjónvarpi.