Wielgus sagði af sér erkibiskupstigninni

Pólski biskupinn Stanislaw Wielgus, sem vígja átti sem erkibiskup Varsjárborgar í dag, sagði af sér embætti skömmu fyrir athöfnina. Mikil reiðialda hefur farið um Pólland eftir að í ljós kom að biskupinn var á sínum tíma á mála hjá leynilögreglu kommúnista. Hróp voru gerð að Wielgus þegar hann tilkynnti um afsögnina í Jóhannesardómkirkjunni í Varsjá í morgun og varð hann því að gera hlé á máli sínu. Kaþólska kirkjan í Póllandi átti stóran þátt í falli kommúnistastjórnarinnar og því líta Pólverjar málið alvarlegum augum.