Juventus freistaði mín aldrei

Gamla kempan Paolo Maldini hjá AC Milan segir að þrátt fyrir ítrekaðan áhuga frá Juventus í gegn um árin, hafi hann aldrei íhugað að skipta um félag. Maldini hefur spilað hverja einustu mínútu á ótrúlegum 23 ára knattspyrnuferlinum hjá Milan - líkt og faðir hans gerði á sínum tíma.

"Ég veit að forsetar Juventus í gegn um árin hafa haft áhuga á að fá mig í þeirra raðir, en ég hef aldrei leitt hugann sérstaklega að því. Þeir þekkja líka mig og fjölskyldu mína og það hve sterk bönd tengja okkur við Milan," sagði Maldini - einn besti og sigursælasti varnarmaður knattspyrnusögunnar.