Þrír létust í ofsaveðri

Níu ára gamall drengur lét lífið þegar tré féll ofan á hann í ofsaveðri sem gengið hefur yfir suðurhluta Svíþjóðar í dag. Tveir karlmenn létust til viðbótar í veðurofsanum þar. Ekki er vitað til þess að nokkur hafi slasast alvarlega í óveðri í Danmörku og Noregi.

Drengurinn sem lést var á ferð með föður sínum á skellinöðru í hádeginu í dag þegar slysið varð. Vindhviða feykti trénu um koll og féll það á feðgana með þessum hörmulegu afleiðingum. Föðurinn sakaði ekki. Slysið varð í Motala um tvö hundruð og fimmtíu kílómetra suð-vestur af Svíþjóð en þar var veður hvað verst.

Sextugur karlmaður lést nokkru síðar þegar tré skall á bíl hans nærri Jönköping í Suður-Svíþjóð. Farþegi, sem var með honum í bílnum, slasaðist alvarlega. Einn maður til viðbótar lést í Málmey. Hann var staddur í bát í höfninni þegar vélarhluti féll á hann. Annar maður slasaðist þegar tré féll á gangandi vegfarendur í Jönköping síðdegis.

Sænska veðurstofan sendi út viðvörun á hæsta stigi og hvatti fólk til að halda sig heima. Síðdegis í dag voru nærri 100 þúsund heimili í landinu án rafmagns. Mörg tré höfðu þá brotnað eða rifnað upp með rótum og fokið á raflínur.

Eyrarsundsbrú var lokuð til klukkan þrjú í dag að íslenskum tíma enda veður lítið betra í Danmörku fram eftir degi. Þar gekk ofsaveður yfir og vindhraðinn á við fellibyl í verstu hviðum. Ferjusiglingum var aflýst og Dönum ráðlagt að bíða veðrið af sér heima. Stórabeltisbrú var einnig lokað en hún opnuð á sjötta tímanum og hafi þá lægt vind.

Ekki fóru Norðmenn varhluta af veðurhamnum og var ferju- og lestarferðum frestað eða aflýst. Norðmenn héldu sig flestir heima. Lestarferðir voru ekki margar í Vesturfold þar sem tré höfðu fallið á teinana á nokkrum stöðum. Vind lægði síðan eftir því sem leið á daginn og lífið komst í samt lag.

Danska veðurstofan spáir hvassviðri aftur í kvöld og næstu nótt á vestur- og norðurhluta Jótlands, þar sem veður var einna verst liðna nótt. Í Noregi og Svíþjóð er spáð nýju lægðardragi þar sem hvessti í dag og því verður áfram vindasamt á svæðinu.