Ekki eitrað fyrir Napóleon

Napoleon Bonaparte dó úr magakrabba en ekki arsenikeitrun, samkvæmt nýrri rannsókn bandarískra vísindamanna. Sögusagnir um að keisarinn fyrrverandi hafi dáið úr eitrun hafa verið á kreiki síðan árið 1961 þegar rannsókn á hári hans leiddi í ljós óvenjumikið arsenik.

Læknar frá Háskólanum í Texas hafa nú yfirfarið krufningarskýrslu frá 1821 og eru sammála þeirri niðurstöðu hennar að æxli hafi dregið Napoleon til dauða. Í skýrslunni er sagt frá tíu sentimetra löngu æxli sem fundist hafi í maga hans. Formaður bandarísku rannsóknarnefndarinnar segir að hann hafi aldrei heyrt um æxli af þeirri stærð, sem ekki hafi verið illkynjað krabbamein.