Ætla að dæla olíu úr flutningaskipi í dag

Björgunarfólk í Devon í Englandi hefur í alla nótt og fram eftir morgni reynt að hreinsa upp varning og brak frá flutningaskipinu Napolí sem var siglt upp í fjöru í gær. Skipið laskaðist töluvert í óveðri í síðustu viku.

Breska strandgæslan sagði í gær að 200 gámar hefðu losnað af skipinu. Í þeim eru meðal annars rafgeymasýra og ilmvötn. Óttast er að 3.500 tonn af svartolíu geti lekið í sjóinn þar sem enn er töluvert öldurót í kringum skipið. 200 tonn hafa þegar farið í sjóinn.

Talið er að hægt verði að byrja að dæla olíu úr skipinu síðar í dag, enda búist við að veður batni á svæðinu þegar líður á daginn.