Eins og að horfa á U2 tónleika með 10 áhorfendum

Blaðamaður Sports Illustrated sem fylgdist með leik Chievo og Inter Milan í ítölsku A-deildinni í gær segir að það hafi verið mjög sérstök upplifun að horfa á margar af skærustu knattspyrnustjörnum heimsins spila leik fyrir luktum dyrum.

Grant Wahl hefur farið á fjölda leikja á Ítalíu í gegn um árin sem blaðamaður Sports Illustrated, en segist í pistli sínum aldrei hafa upplifað annað eins og í gær. Hann hitti líka stuðningsmenn beggja liða fyrir utan leikvanginn í Verona sem er einn margra valla sem lokaðir hafa verið fyrir áhorfendum eftir harmleikinn um daginn þegar lögreglumaður lét lífið í átökum við knattspyrnubullur.

"Ég hef fylgst með leikjum í amerísku atvinnudeildinni þar sem aðeins um 9.000 áhorfendur mættu á völlinn, en að sjá stjörnur á borð við Figo, Patrick Vieira, Hernan Crespo, Adriano og Marco Materazzi spila fyrir luktum dyrum var mjög sérstakt," sagði Wahl í pistli sínum.

"Maður heyrði greinilega klapp í lófum leikmanna þegar þeir tókust í hendur fyrir leikinn og maður heyrði dynkinn þegar Adriano skaut boltanum í stöng og inn og skoraði fyrir Inter. Þetta var eins og að vera á U2 tónleikum með 10 áhorfendum. Þetta var súrrealísk upplifun, en um leið tómleg. Það vantaði alla sál í leikinn," skrifaði Wahl, en ef vel var hlustað mátti heyra baráttusöngva stuðningsmanna fyrir utan leikvanginn.

Hann ræddi líka við bitra stuðningsmenn Chievo fyrir utan völlinn, en þeir þurfa nú að líða fyrir voðaverk nokkurra vitleysinga og fá ekki að mæta á leiki liðs síns í deildinni - þrátt fyrir að hafa verið kjörnir prúðustu stuðningsmennirnir á Ítalíu hvorki meira né minna en fimm ár í röð.

"Við erum gríðarlega vonsvikin," sagði 19 ára gamall stuðningsmaður Chievo. "Við höfum verið prúðustu stuðningsmennirnir í ítalska boltanum í mörg ár og þetta bann kemur verst niður á þeim sem best hafa hagað sér," sagði hann, en í hópi stuðningsmanna Chievo mátti einnig sjá gamlan mann sem bar trefil um mittið sem á stóð "FORZA CHIEVO"

Stuðningsmenn Inter voru jafn vonsviknir en létu bannið ekki hafa áhrif á sig þegar þeir ferðuðust nokkra klukkutíma til að fylgja liði sínu á útivöll - þó þeir fengju ekki einu sinni að reka nefið inn á völlinn. "Þetta hefur auðvitað gríðarleg áhrif á mitt líf, því er ekki að neita. Við eigum útileik gegn Palermo á Sikiley um næstu helgi, en ég ætla að mæta hvort sem ég fæ að fara inn á leikinn eða ekki," sagði einn gallharður stuðningsmaður Inter.

Ástandið í ítalska fótboltanum er því vægast sagt skelfilegt og mikið má vera ef deildin nær aftur að rífa sig upp úr lægð óeirða og spillingarmála og vinna aftur sinn sess sem ein besta deildarkeppni í heiminum með þeim spænsku, ensku og þýsku.