Fjölskylda Cho harmar fjöldamorðin

Fjölskylda Cho Seung-hui, mannsins sem banaði 32 samnemendum sínum og kennurum við Virginía Tech-háskólann í Blacksburg í byrjun vikunnar, sendi frá sér yfirlýsingu í gær þar sem hún sagðist slegin miklum harmi vegna voðaverkanna sem ástvinur þeirra vann. Í yfirlýsingunni sem systir Cho skrifaði fyrir hönd fjölskyldu þeirra, segir að hún sé algerlega miður sín yfir harmleiknum og hana hafi aldrei órað fyrir því að Cho væri fær um að fremja slík illvirki. Líf hennar væri nú samfelld martröð. Lögmaður fjölskyldunnar segir að ættingjar Cho muni ekki tjá sig frekar um þetta hörmulega mál en þeir dvelja á óþekktum stað undir vernd lögreglu.