Gistinóttum fjölgaði um 19 prósent

Gistinóttum á hótelum í marsmánuði fjölgaði um tæplega 19 prósent frá marsmánuði í fyrra. Heildarfjöldi fór úr tæplega 74 þúsundum í tæp 88 þúsund. Samkvæmt nýjum tölum Hagstofunnar fjölgaði gistinóttum í öllum landshlutum nema á Suðurnesjum, Vesturlandi og Vestfjörðum þar sem þeim fækkaði um tvö prósent.

Aukningin var hlutfallslega mest á Austurlandi þar sem fjölgunin var rúmlega helmingur og fór í tvö þúsund og sjö hundruð. Á höfuðborgarsvæðinu var fjölgunin um 23 prósent og var heildarfjöldi gistinátta rúm 64 þúsund.