Afþakkaði fund með Naomi Campbell

Breska hnefaleikaundrið Amir Khan vakti athygli í heimalandi sínu á dögunum þegar hann afþakkaði tækifæri til að hitta ofurfyrirsætuna Naomi Campbell. Khan er nú að undirbúa sig fyrir erfiðasta bardaga sinn á ferlinum til þessa og afþakkaði því að sitja fyrir á síðum Vogue til að einbeita sér að þjálfuninni.

"Það hefði verið frábært að fá að hitta Naomi því hún er ein helsta fyrirsæta heimsins í dag. En því miður var myndatakan sett svo nálægt bardaganum mínum þann 6. október þannig að ég varð að afþakka. Hún kannski kemur á bardagann í staðinn - þá skal ég verða henni út um bestu sætin í húsinu," sagði Khan sem mætir harðjaxlinum Scott Lawton í Nottingham í næsta bardaga.

Khan er eitt skærasta ungstirnið í boxinu í dag, en fékk í fyrsta sinn almennilega mótspyrnu í síðasta bardaga þegar hann mætti Willie Limond. Hann ætlar því ekki að láta ofurfyrirsætur eða annnað standa í vegi fyrir þjálfunarferlinu að þessu sinni.