Stöð 2 fær átta tilnefningar til Eddunnar

Átta tilnefningar til Edduverðlaunanna 2007 tengjast Stöð 2. Fréttaskýringarþátturinn Kompás er tilnefndur í flokknum Frétta- og/eða viðtalsþáttur ársins. Kompás hlaut verðlaunin í fyrra. Gamanþáttaröðin Næturvaktin fær tilnefningu fyrir leikið sjónvarpsefni og handrit. Pétur Jóhann Sigfússon fær einnig tilnefningu fyrir hlutverk sitt í þáttunum.

Stelpurnar fá sömuleiðis tilnefningu í flokknum leikið sjónvarpsefni, en þær hlutu Edduverðlaunin á síðasta ári í sama flokki. Sjónvarpsþátturinn Tekinn 2 fær tilnefningu fyrir Skemmtiþátt ársins. Þá fá Edda Andrésdóttir fréttamaður og Jóhannes Kr. Kristjánsson ritstjóri Kompáss tilnefningar sem Sjónvarpsmaður ársins.