Maddie – Vettvangnum spillt á einum klukkutíma

Sönnunargögnum í íbúð McCann hjónanna í Praia da Luz var algjörlega spillt á innan við einum klukkutíma eftir að hvarf Madeleine uppgötvaðist. Þetta er haft eftir tveimur fyrstu lögreglumönnunum sem komu á vettvang við upphaf rannsóknarinnar.

Mennirnir sem eru starfsmenn portúgölsku lögreglunnar ásaka yfirmenn sína fyrir að innsigla svæðið ekki strax og tryggja að sönnunargögn skemmdust ekki. Tvímenningarnir töluðu við breska blaðið Sun en vildu ekki láta nafna sinna getið.

Annar þeirra sagði að innan við klukkutíma eftir að lögreglan kom á svæðið hefði ríkt algjör ringulreið á svæðinu. Lögreglumennirnir sem komu á vettvang hefðu búist við að yfirmenn þeirra hefðu stjórn á rannsókninni, en svo hefði ekki verið. „Það var eins og þeir væru ekki á staðnum."

„Fjölskylda, vinir, nágrannar, starfsfólk, fólk af götunni - allir fóru inn og út úr svefnherberginu til að kíkja undir rúmið, skaðinn varð þá." Hvaða mannshvarf sem væri ætti hins vegar að meðhöndla sem glælp.

Félagarnir sögðu jafnfram að eitthvað óvenjulegt hefði verið við atvikið og foreldra Madeleine, Kate og Gerry. Annar þeirra sem hefur 20 ára starfsreynslu sagði þau hafa verið í uppnámi, fálmkennd og með galopin augu. Það séu reyndar eðlileg viðbrögð við svona kringumstæðum, en eitthvað annað hafi ekki verið eðlilegt.

Fólkið hafi allt haft áfengi um hönd og þess vegna hafi verið erfitt að eiga við þau, þótt að þau hafi ekki verið ofurölvi. „Þegar þú ert hræddur og adrenalínið er á fullu eru viðbrögðin oft eins og hjá barni. Þú heldur að allir viti það sem þú veist. Það var erfitt að skilja þau. "

Þetta var einmitt spurning Paulo Rebelo nýs yfirmanns rannsóknarinnar sem spurði vitni í gær hversu mikið McCann hjónin hefðu drukkið kvöldið sem Madeleine hvarf.

Lögreglumennirnir tveir sögðust einnig hafa undrast af hverju McCann hjónin hringdu ekki á lögreglu fyrr en 40 mínútum eftir að hvarfið uppgötvaðist.

Þeir sögðu að hvort sem það væri rétt eða rangt myndi grunur alltaf beinast að foreldrum Madeleine þar til sannleikurinn kæmi í ljós.