Guðrún Sóley og María Björg aftur í KR

Varnarmaðurinn Guðrún Sóley Gunnarsdóttir og markvörðurinn María Björg Ágústsdóttir eru gengnar í raðir KR á nýjan leik.

Guðrún Sóley er uppalinn KR-ingur en lék með Breiðabliki síðastliðin tvö ár. Hún skrifaði í dag undir eins árs samning en hún er 26 ára gömul.

María Björg er árinu yngri en hún hefur tekið sér frí frá knattspyrnu undanfarin tvö ár. Hún lék með KR árin 2004 og 2005 en kom til félagsins frá Stjörnunni á sínum tíma. Hún gerir einnig eins árs samning.

Þá gerði annar markvörður, Íris Dögg Gunnarsdóttir, langtímasamning við KR út leiktíðina 2010. Hún er uppalin hjá Fylki en kom til KR á síðasta ári. Hún stóð í marki KR í sumar.