Hlustendaverðlaunin aldrei flottari

„Þetta kostar margar milljónir," segir Brynjar Már Valdimarsson, tónlistarstjóri FM957. Hinn 3. maí verða Hlustendaverðlaun FM957 veitt við hátíðlega athöfn í Háskólabíói. „Þetta verða flottustu hlustendaverðlaun hingað til. Ef allt heppnast verður þetta „mind­blowing"," segir Brynjar en starfsmenn FM957 vinna baki brotnu að því að gera þennan viðburð að veruleika, í samvinnu við Sagafilm.

Afhending Hlustendaverðlaunanna verður sýnd í beinni útsendingu á Stöð 2 og er það í fyrsta sinn sem það er gert. „Þetta byrjar á rauða dreglinum, þremur korterum fyrir útsendingu á Stöð 2 extra. Þá verður stiklað á stóru með tónlistarmönnum landsins. Hátíðin sjálf hefst svo formlega klukkan 21.30 í beinni á Stöð 2."

Brynjar segir að öll stærstu nöfnin í íslenskri tónlist komi fram á hátíðinni. „Svo munu flestar skærustu sjónvarpsstjörnur landsins sjá um að kynna og veita verðlaun," segir Brynjar.

Stóri salurinn í Háskólabíói rúmar 970 manns. Miðasala hófst á miðvikudag og fer vel af stað. „Síðan munum við gefa hlustendum miða í bestu sætin."

Að hátíðinni lokinni verður svo partí fyrir tónlistarmennina og aðstandendur hátíðarinnar. Það verður ekki í beinni útsendingu þó. „Nei, sem betur fer," segir Brynjar og hlær.- shs