Svínahryggur með pöru

21. febrúar 2008 00:01

Svínahryggur með pöru

Fjöldi matargesta: 4

2.5 kg svínahryggur , á beini
2 Stk. hvítlauksgeirar , pressaðir
3 Stk. lárviðarlauf , mulin
0.25 Tsk. negull
gróft salt
pipar , nýmalaður
2 Stk. laukur , skornir í þykkar sneiðar
olía
soð og skófir úr steikarskúffunni
350 ml. vatn
1 Tsk. kjötkraftur , eftir smekk
salt , ef þarf
100 ml. rjómi
sósujafnari , eða hveiti til þykkingar

Leiðbeiningar

Takið kjötið úr kæli um klukkustund fyrir steikingu. Ristið skurði í pöruna með dúkahníf eða beittum hnífsoddi með um 1 cm millibili (eða látið gera það í kjötborðinu). Setjið hvítlauk, lárviðarlauf, negul, salt og pipar í skál og blandið vel saman. Núið blöndunni inn í kjötið og pöruna og gætið þess að krydda ofan í hvern skurð.

Penslið steikarformið með svolítilli olíu og raðið lauksneiðum í það. Setjið hrygginn á grind og látið pöruna snúa upp. Hitið ofninn í 230°. Steikið hrygginn í um 20 mín. Lækkið þá hitann í 170° og steikið áfram í um 2 klst., eða þar til safinn sem rennur úr þegar prjóni er stungið djúpt í kjötið er alveg tær. Best er þó að nota kjöthitamæli og ætti hann þá að sýna 70-72°, sé honum stungið í miðju. Takið kjötið úr ofninum og setjið það á fat eða bretti, breiðið álpappír lauslega yfir og látið það standa á hlýjum stað í a.m.k. 25 mín. áður en það er borið fram.

Setjið steikarformið á heita eldavélarhellu (ef það þolir slíka meðferð), hellið hvítvíni eða eplasafa í og skafið botninn vel til að losa um skófir. Ef formið þolir ekki að fara á eldavélina er best að hella víninu í það á meðan það er enn sjóðheitt úr ofninum. Fleytið mestalla fituna ofan af og síið soðið í pott. Bætið vatni og kjötkrafti í pottinn og látið sjóða í nokkrar mínútur. Hrærið rjómanum saman við soðið, smakkið og bragðbætið eftir þörfum með pipar, salti og e.t.v. meiri kjötkrafti. Þykkið sósuna með sósujafnara eða hveitihristingi en hafið hana þó fremur þunna.