Stelpurnar spila um 13. sætið

Íslenska 20 ára lið kvenna vann sinn þriðja leik í röð í baráttunni um sæti á HM í Makedóníu þegar liðið vann flottan tólf marka sigur, 39-27, á heimastúlkum í Makedóníu í gær.

Íslensku stelpurnar hafa aðeins tapað einum leik á mótinu og spila við Japan um 13. sætið á morgun. Karen Knútsdóttir skoraði 9 mörk (6 víti) og nýtti öll sín skot í leiknum, Hildigunnur Einarsdóttir skoraði 7, Auður Jónsdóttir 6 og þá var Rut Jónsdóttir með 5 mörk og 10 stoðsendingar í leiknum. Guðrún Ósk Maríasdóttir varði 14 skot, þar af 2 víti.