„Allur heimurinn veit hvað þessir leik­menn gera“

Úkraína hefur komist í lokakeppni EM í þrjú af síðustu fjórum skiptum en árangurinn á mótunum bliknar þó í samanburði við árangur Íslands sem komst í undanúrslit á síðasta móti. Liðin eru í riðli með Serbíu og Eistlandi og komast tvö efstu liðin beint á EM auk þess sem fjögur lið af átta sem enda í 3. sæti í undankeppninni komast á mótið.

Á vef úkraínska miðilsins Suspilne segir að Úkraína hefji undankeppnina á erfiðasta verkefninu – útileik gegn Íslandi. Þjálfarinn Brazhnyk nefndi sérstaklega þá Gísla Þorgeir Kristjánsson og Ómar Inga Magnússon, leikmenn Magdeburgar, sem leikmenn sem þyrfti að halda í skefjum. Hann sagði alla vita hvernig þeir spiluðu en að því miður væri sú vitneskja ekki nóg til að stoppa þá.

„Tveir lykilleikmenn. Þeir spila nákvæmlega eins í Meistaradeildinni og í Bundesligunni eins og með landsliðinu. Við horfðum á myndbönd,“ sagði þjálfarinn við Suspilne.

„Já, þetta verður erfitt, en við munum berjast. Allur heimurinn veit hvað þessir leikmenn gera. En þeir leika samt á alla, þannig að við munum reyna að gera þeim erfiðara fyrir,“ sagði Brazhnyk.

„Ísland spilar mjög hraðan handbolta, það verður mjög erfitt að eiga við þá. Þetta er lið sem hleypur allar 60 mínúturnar og spilar líklega ekki 35 sekúndna [sóknir] eins og nú tíðkast í úkraínsku deildinni, heldur 25 sekúndna. Við munum þurfa að hlaupa,“ sagði Brazhnyk.

Hann sagði markmiðið skýrt um að komast á EM og rifjaði upp að Úkraínumenn hefðu þurft að bíða milli vonar og ótta inni í búningsklefa í lok síðustu undankeppni, eftir að hafa hafnað í 3. sæti síns riðils, áður en í ljós kom að þeir kæmust á mótið með sjö mörkum betri heildarmarkatölu en Litháen sem lék í öðrum riðli.

Ísland hefur komist á hvert einasta Evrópumót á þessari öld eða frá og með árinu 2000.