Jones íhugar að hætta ef hann tapar fyrir Calzaghe

Hnefaleikagoðsögnin Roy Jones jr viðurkennir að líklega muni hann leggja hanskana á hilluna ef hann tapar fyrir Joe Calzaghe í bardaga þeirra í nóvember.

Walesverjinn Calzaghe hefur unnið alla 45 bardaga sína á ferlinum, en mikil eftirvænting ríkir vegna bardaga þessara gömlu jaxla í New York. Bardaginn átti upprunalega að fara fram í september en honum var frestað eftir að Calzaghe meiddist á hendi.

Roy Jones er 39 ára gamall og hefur unnið 52 af 56 bardögum sínum á ferlinum. Hann hefur náð að rétta við feril sinn í síðustu bardögum eftir að hafa verið slakur síðustu ár. Hann var á sínum tíma álitinn besti hnefaleikari heims pund fyrir pund - en hann telur Calzaghe bera þann titil í dag.

"Ef ég tapa fyrir Joe, reikna ég alveg eins með að hætta. Ef hann sigrar mig, þá er hann að vinna þann besta og þá hef ég engar afsakanir. Hann er besti hnefaleikari heimsins pund fyrir pund," sagði Jones.

Hann segir ekkert til í þeim fullyrðingum að Calzaghe sé ekki höggþungur hnefaleikari, eða "klappari" eins og það er kallað.

"Ég skil ekki af hverju menn tala um að hann sé klappari. Menn sögðu einu sinni að ég væri klappari, en ég rotaði þá samt. Klappari er ekki í vandræðum með hendurnar á sér, en Joe er einmitt í vandræðum með hendurnar á sér núna og það segir mér að hann sé höggþungur," sagði Jones.

Hann var spurður hvort hann væri búinn að kynna sér veikleika Walesverjans fyrir bardaga þeirra.

"Ég leita ekki að veikleikum andstæðinga minna. Minn stærsti veikleiki er sá að ég vil alltaf berjast við þá bestu. Bardagi Calzaghe við mig verður mest spennandi bardagi hans á ferlinum af því hann er að berjast við besta boxara sem hann hefur nokkru sinni mætt," sagði Jones brattur.