Þráðlausir peningar eru handan við hornið

Víða erlendis er að ryðja sér til rúms tækni þar sem farsímar virka sem greiðslukort, bankareikningar og seðlar. Það verður sum sé hægt að borga fyrir innkaup og reikninga með því að ýta á einn takka á farsímanum.

Tæknin ber nafnið NFC eða Near Field Communication og eru farsímarnir, með slíka tækni innbyggða, væntanlegir á markaðinn á næsta ári í Danmörku að því er segir í umfjöllun Jyllands Posten um málið.

Þessi tækni er þegar í notkun í nokkrum löndum en þar hefur hún orðið bitbein milli símafyrirtækja og banka. Greiðslumarkaðinum þarf að skipta upp á milli þessara aðila þar sem NFC ryður sér til rúms. „Meðan símafyrirtækin koma auga á aukna tekjumöguleika berjast bankarnir við að setja upp girðingar kringum sín viðskipti," segir í Jyllands Posten.

Fram kemur að bankarnir í Danmörku hafa lengi undirbúið sig undir að greiðslur með farsímum yrðu að raunveruleika. Þannig stofnaði Middlefart Sparekasse strax árið 2006 sitt eigið farsímafyrirtæki til að vera undirbúinn fyrir framtíðina hvað þetta varðar.