Mourinho bara rétt að byrja á leikmannamarkaðnum

Ítalska úrvalsdeildarfélagið Inter frá Mílanóborg hefur þegar tryggt sér þjónustu leikmannanna Thiago Motta og Diego Milito fyrir næsta keppnistímabil, en knattspyrnustjórinn José Mourinho staðfesti í viðtali við Gazzetta dello Sport að hann vilji fá alla vega þrjá leikmenn til viðbótar í sumar.

„Ég vill ekki nefna nein nöfn en mig vantar alla vega einn framherja, einn miðjumann og einn miðvörð. Ef að það gengur eftir þá verðum við mjög öflugir," segir Mourinho.

Varnarmaðurinn Ricardo Carvalho hjá Chelsea hefur sterklega orðaður við endurfundi við Mourinho og þá hafa Alex hjá Chelsea og Simon Kjaer hjá Palermo einnig verið nefndir til sögunnar sem líkleg skotmörk fyrir Inter.

Deco hjá Chelsea og Elano Manchester City hafa verið í umræðunni varðandi miðjumenn sem Inter er á eftir og Samuel Eto'o hjá Barcelona og Antonio Cassano hjá Sampdoria sem líklegir framherjar til þess að klæðast litum Inter.