Loftið farið að leka úr gullverðsbólunni

Efnahagur Bandaríkjanna virðist kominn í bata sem gæti leitt af sér hærri vexti þarlendis og sterkara gengi dollarans. Þegar dollarinn styrkist lækkar verð á gulli, að því er segir á börsen.dk.

„Nokkuð af lofti hefur lekið úr gullverðsbólunni þegar dollarinn virðist ætla að ná til baka nokkru af tapi sinu gagnvar öðrum gjaldmiðlum," segir Yu Kyung Kyu hrávörusali hjá Eugene Investments & Futures í samtali við Bloomberg fréttaveituna. „En það er enn of snemmt að segja til um hvort gullið breyti bjartsýnissveiflu sinni."

Olíuverðið hefur farið í öfuga átt við gullið hvað verð snertir og hækkar örlítið í morgun eða um 0,3% og stendur í 75,69 dollurum á markaðinum í New York.

Álverðið á markaðinum í London lækkar lítillega í morgun og stendur í 2.136 dollurum á tonnið miðað við þriggja mánaða framvirka samninga. Þetta verð fór í 2.144 dollara fyrir helgina og hafði þá ekki verið hærra frá því um mitt sumar í fyrra.