Freyr: Við guggnuðum

Freyr Alexandersson, þjálfari Vals, var heldur niðurlútur eftir að hans lið tapaði fyrir Breiðabliki í Pepsi-deild kvenna í kvöld á dramatískan máta.

Valur var með 2-1 forystu þegar venjulegur leiktími rann út en þá skoruðu Blikar tvö mörk í uppbótartíma og tryggðu sér þannig ótrúlegan sigur.

„Við guggnuðum," sagði Freyr. „Við vorum miklu betri í leiknum en það er bara ekkert spurt að því. Þær skoruðu tvö ótrúleg mörk í uppbótartíma. Þetta er eins og köld vatnsgusa í andlitið."

Hann sagði að aðstæður hafi gert leikmönnum erfitt fyrir enda sterkur vindur á Vodafone-vellinum í kvöld.

„Við fórum í þennan leik með tvö plön - að leika með vindi og á móti vindi. Það gekk vel hjá okkur. Ég var reyndar ekki nægilega sáttur við fyrri hálfleikinn en sá síðari, þegar við lékum á móti vindinum, gekk mun betur. Þá náðum við að skapa okkur fullt af færum og allt það sem við lögðum upp með var að skila sér. Það eina sem við þurftum að gera var að klára leikinn."

Freyr heitir því að Valur muni ekki tapa fleiri stigum í sumar. „Hin liðin eiga eftir að misstíga sig einhversstaðar á leiðinni enda mótið jafnara en oft áður. Ef ekki þá förum við í Kópavoginn og náum í þrjú stig þar. Við þurfum fyrst og fremst að hugsa um okkur að taka þau stig sem eru í boði."