Ósvífinn klámormur herjar á Facebook notendur

Fjöldi af Facebook notendum hafa orðið fyrir barðinu á því sem Jyllands Posten kallar ósvífinn klámorm. Ormurinn virkjast á Facebook síðum með því að notendur þeirra smella á mynd af vægast sagt léttklæddum kvennmanni sem þeim berst í pósti á vefsíðunni.

Jyllands Posten vitnar í fréttaþjónustu Computerworld í umfjöllun sinni um málið. Þar segir að ormurinn birtist á svokölluðum „vegg" á Facebook-síðum og eftir að hafa sýkt tölvu viðkomandi tengi hann Facebooksíðuna við klámsíðu. Myndin af hinni léttklæddu konu birtist með skilaboðunum „click da button baby".

„Vafrinn sem Facebook notandinn er með í notkun mun opna stærri útgáfu af konumyndinni við það að smella á hana og ef smellt er áfram tengist viðkomandi við klámsíðu," segir Roger Thompson greinandi hjá vírusvarnafyrirtækinu AVG Technologies en á heimasíðu þess má sjá myndband af því hvað gerist.

Hönnuðir ormsins virðast græða peninga á því að beina aukinni umferð inn á klámsíður en sérfræðingar eru ekki alveg sammála um hvað ormurinn hefur fleira í för með sér. Sumir telja að hann safni einnig saman viðskiptalegum upplýsingum frá notendum og þær séu síðan notaðar til kaupa á varningi án vitundar notendans.

Facebook hefur sent frá sér aðvörun vegna þessa orms en í henni segir m.a. að síðan hafi gert ráðstafnir til að loka fyrir urlið sem tengist klámsíðunni og að verið sé að hreinsa til á þeim stöðum þar sem ormsins hefur orðið vart.