Kristín Ýr: Þurfum bara að einbeita okkur að okkur sjálfum

Markadrottningin Kristín Ýr Bjarnadóttir hjá Val hélt uppteknum hætti í Pepsi-deildinni í kvöld þegar hún skoraði seinna mark liðs síns í 2-0 sigri gegn Fylki. Markið var hennar átjánda mark í deildinni í sumar og hún er sem stendur markhæst þegar þrjár umferðir eru eftir.

Kristín Ýr er afar sátt með að Valsstúlkur hafi náð að rífa sig upp eftir tapið gegn Þór/KA og sé áfram með örlögin í eigin höndum þegar deildin fer í frí.

„Mér fannst við mæta mjög vel stemdar til leiks og það var fínn kraftur í okkur í fyrri hálfleik en síðan fannst mér við detta aðeins niður í þeim seinni. Það var bara eins og við værum í einhverju móki en kannski var þetta einhver þreyta.

Mér fannst við samt alveg vera með leikinn í okkar höndum allan tímann og við stjórnuðum spilinu," segir Kristín Ýr.

„Það er alveg merkilegt með það að þegar við töpum stigum þá bregst það varla að liðin í kringum okkur í töflunni misstíga sig í næstu umferð á eftir og ég veit ekki hvaða gæfa það er eiginlega.

Við þurfum annars bara að einbeita okkur að okkur sjálfum og okkar leik því um leið og maður fer að setja fókusinn of mikið á andstæðinginn þá fer allt í vaskinn einhvern veginn," segir Kristín Ýr.

Kristín Ýr er á meðal þeirra leikmanna sem halda nú utan og keppa fyrir Íslands hönd á EM í Finnlandi og hlakkar vitanlega mjög til þess en hún segir enn fremur mikilvægt að koma til baka af fullum krafti í lokasprettinn í deildinni.

„Það er líka mikilvægt fyrir okkur sem fara út að koma vel stemdar til baka eftir Finnlandsferðina því það er náttúrulega misjafnt hvað hver og ein á eftir að fá að spila þarna úti.

Við verðum því að gera okkar til þess að halda okkur í formi og vonandi komumst við líka heilar í gegnum þetta, 7, 9, 13, því við höfum verið mjög heppnar með meiðsli í sumar," segir Kristín Ýr vongóð að lokum.