Óttinn við svínaflensuna veldur niðursveiflu á mörkuðum

Flugfélög og félög í ferðamannaiðnaðinum víða um heim verða fyrir barðinu á óttanum við svínaflensuna. Hlutir í þessum félögum hrapa í verði á mörkuðum í dag.

Á sama tíma hafa hlutir hjá lyfjaframleiðendum og félögum sem framleiða lækningatól eins og andlitsgrímur og gúmmíhanska hækkað verulega.

Þá hefur dollarinn veikst verulega gagnvart jeninu og gengi mexískanska pesósins hefur fallið um 3% í fyrstu viðskiptum dagsins á gjaldeyrismörkuðum.

Sem dæmi um verðfallið má nefna að hlutir í British Airways hafa fallið um 17% í morgun og hjá SAS er fallið um 7%. Hinsvegar hafa hlutir í Top Glove, stærsta framleiðenda heims á gúmmíhönskum, hækkað um 8% svo dæmi sé tekið.

Í frétt um málið í The Guardian segir að fjárfestar í Asíu séu sérstaklega taugaveiklaðir vegna málsins enda minnugir þess sem gerðist þegar fuglaflensan geysaði árin 2005 og 2006 þar í álfu.

Sem stendur eru yfir 100 manns látnir úr flensunni í Mexíkó og yfir 400 eru sýktir. Flensan hefur breiðst út til suðurhluta Bandaríkjanna þar sem 20 tilfelli af flensunni hafa verið staðfest.