Tekist á um Arsenal

Kaupsýslumaðurinn Stephen Perry reynir hvað hann getur til að tryggja dreifða eignaraðild í enska knattspyrnufélaginu Arsenal. Bandaríski viðskiptajöfurinn Stan Kroenke sem á 28,3% hlut í félaginu reyndi nýverið að fjárfesta í 8% sem er í eigu Carr-fjölskyldunnar. Þá er búist við að rússenski stálrisinn Alisher Usmanov blandi sér einnig í baráttuna en nú þegar á hann 25% hlut í knattspyrnufélaginu.

Heimildir herma að Carr-fjölskyldan hafi hafnað tilboði Kroenke sem hljóðaði upp á rúmlega 50 milljónir punda eða jafnvirði 6,3 milljarða króna.

Fjölskyldan mun þess í stað hafa boðið Perry að kaupa hlutinn. Talið er allt eins líklegt að fjölskyldan sé með þessu að reyna að þrýsta verðið upp og fá stóru hluthafana til að greiða mun meira fyrir hlut þeirra í félaginu.