Fjölskylda bílasala í Köge græddi 14 milljarða á skortsölu

Fjölskylda fyrrum bílasala í Köge á Sjálandi í Danmörku græddi 700 milljónir danskra kr. eða tæplega 14 milljarða kr. á skortsölu á danska hlutabréfamarkaðinum á síðasta ári.

Bílasalinn Allan F. Andersen og fjölskylda hans stofnuðu fjárfestingarfélag fyrir nokkrum árum og töpuðu töluverðum peningum á því. Var staða þess um áramótin 2007/2008 við núllið. Þá ákvað fjölskyldan að taka skortstöðu í danska hlutabréfamarkaðinum nær allt síðasta ár.

Niðurstaðan um síðustu áramót var sú að fjölskyldufélagið var með eiginfjárstöðu upp á 1,2 milljarða danskra kr. en skuldir á móti námu 481 milljónum danskra kr. Hreinn hagnaður sum sé 700 milljónir dankra kr.

Í frétt um málið í Jyllands Posten segir að danski hlutabréfamarkaðurinn hafi fallið um 46% á síðasta ári og á því hafi fjölskyldan hagnast vel. Hinsvegar er tekið fram að yfirleitt séu vogunarsjóðir í áhættufjárfestingum af þessu tagi en ekki fjölskylda frá smábæ á Sjálandi.

Skortsala er sem kunnugt er ef menn fá hlutabréf lánuð til einhvers tíma en selja þau strax. Ef gengi þeirra fellur fram að afhendingartímanum hagnast sá sem fékk bréfin lánuð sem nemur mismuninum. Ef bréfin hækka í verði tapar hann að sama skapi.