TrygVesta kaupir tryggingarfélag af Milestone í Svíþjóð

Dansk/norska tryggingarfélagið TrygVesta hefur keypt tryggingarfélagið Moderna Försäkringar af Milestone í Svíþjóð. Kaupverðið er tæpir 1,3 milljarður sænskra kr. eða um 16 milljarðar kr..

Í tilkynningu um málið frá TrygVesta segir að með kaupunum muni félagið styrkja stöðu sína á sænska tryggingarmarkaðinum og reiknað er með að hlutdeild TrygVesta þar muni aukast úr 0,5% upp í ca. 2,5%.

Moderna Försäkringar starfaði einkum á sviði sjúkra- og slysatrygginga og trygginga fyrir fyrirtæki. Eigið fé þess við kaupin nam 616 milljónum sænskra kr. eða um helmingi kaupverðsins. Heildartekjur þess á síðasta ári námu 1,2 milljörðum sænskra kr. og var tap á rekstrinum upp á 18 milljónir sænskra kr..