Eistar niðurlægðir að Ásvöllum

Strákarnir okkar áttu frábæran dag er þeir niðurlægðu Eista að Ásvöllum, 38-24, í undankeppni EM 2010. Þeir gáfu ekkert eftir allan leikinn og unnu verðskuldaðan stórsigur fyrir framan stútfullt hús af áhorfendum.

Mörk Íslands: Ásgeir Örn Hallgrímsson 7, Aron Pálmarsson 6, Guðjón Valur Sigurðsson 5/3, Rúnar Kárason 3, Þórir Ólafsson 3, Ragnar Óskarsson 3, Ingimundur Ingimundarson 3, Vignir Svavarsson 2, Sturla Ásgeirsson 2, Róbert Gunnarsson 2, Sigurbergur Sveinsson 2.

Varin skot: Björgvin Páll Gústavsson 12, Hreiðar Guðmundsson 6.

Vísir var með leikinn í beinni textalýsingu og má sjá hana hér að neðan.

57. mín: Flestir áhorfendur ætla að bíða til loka leiksins og hylla strákana sem er ánægjulegt. Áhorfendur verið frábærir rétt eins og strákarnir okkar. 36-23.

52. mín: Allir útileikmenn íslenska liðsins búnir að skora fyrir utan Sverre Jakobsson. Leikurinn að fjara út í rólegheitum. 33-21

47. mín: Guðmundur farinn að skipta öllum af bekknum enda sigurinn í höfn. Þeir sem inn koma spila ekkert verr en hinir. Blússandi sigling á íslenska liðinu sem er að kaffæra Eista. 31-19.

43. mín: Æðibunugangurinn var orðinn fullmikill í íslenska liðinu og Eistar minnkuðu muninn í tíu mörk. Þá slakaði íslenska liðið á og fór aftur að spila almennilega. 28-16

37. mín: Síðari hálfleikur kominn á fullt. Íslenska liðið ekkert að gefa eftir þó svo það sé smá agaleysi í sókninni og sóknirnar í styttri kantinum. 24-12.

Hálfleikur: Frábær fyrri hálfleikur að baki hjá íslenska liðinu sem leiðir með tólf mörkum, 20-8. Það er fyrst og fremst frábær varnarleikur sem hefur lagt grunninn að þessum stóra muni. Strákarnir hafa svo keyrt mögnuð hraðaupphlaup og skorað úr einum 11 slíkum.

Allir að skila sínu og liðið ekkert að slaka á þó svo munurinn sé mikill. Fagmannleg frammistaða það.

Guðjón Valur markahæstur með 4 mörk, þar af 3 úr vítum. Björgvin Páll búinn verja 7 skot en íslenska vörnin hefur þvingað Eistana til að taka mörg erfið skot sem hafa farið yfir markið eða framhjá.

25. mín: Strákarnir eru að klára þennan leik hér í fyrri hálfleik. Mögnuð frammistaða og staðan 18-7.

21. mín: Eistarnir eiga engin svör við leik íslenska liðsins sem er hreinlega að keyra yfir gestina. 15-7.

18. mín: Eistar skoruðu tvö mörk í röð en því var svarað um hæl. Íslenska liðið ekkert að gefa eftir og er með tröllatak á þessum leik. 14-7.

15. mín: Strákarnir hafa verið að spila svakalega góða vörn sem Eistar hafa lítið ráðið við. Munurnn gæti verið meiri enda hefur Ísland klúðrað tveim hraðaupphlaupum. Samt afar þægileg staða, 11-5.

11. mín: 9-4 fyrir Ísland og þar af 4 mörk úr hraðaupphlaupum. Björgvin að verja vel. Eistar taka leikhlé.

10. mín: Vörnin að koma og strákarnir keyra hraðaupphlaupin með góðum árangri. 8-4.

8. mín: Sóknarleikurinn að rúlla ágætlega en vantar aðeins upp á vörnina. Guðjón Valur kominn með 3 mörk. 6-4.

5. mín: Allt of mikið af fólki í húsinu. Ekki hreinlega pláss fyrir alla. Eistarnir láta stemninguna ekki hafa áhrif á sig og standa í okkar mönnum í upphafi. 4-3 fyrir Ísland.

0. mín: Troðfullt hús og svakaleg stemning. Vonandi hjálpar það strákunum.

0. mín: Það er fín stemning í húsinu og gríðarlega vel mætt. Húsið nánast orðið fullt þegar 15 mínútur eru í leikinn.

Í íslenska liðið vantar Snorra Stein Guðjónsson frá síðasta leik. Snorri er meiddur á hné og spilar ekki næstu mánuðina. Vignir Svavarsson kemur inn í hópinn í stað Kára Kristjáns Kristjánssonar. Vignir var í banni í síðasta leik.

Það er færeyskt dómarapar á leiknum en Færeyingar koma mikið við sögu í íþróttaviðburðum dagsins.