Playboy til sölu, Virgin hugsanlegur kaupandi

Fregnir berast nú af því að hinn 83 ára gamli gleðigosi Hugh Hefner ætli að selja Playboy-veldi sitt. Virgin er nefnt sem hugsanlegur kaupandi. Söluverðið er um 200 milljónir punda eða rúmlega 40 milljarðar kr.

Samkvæmt frétt um málið í Daily Mail hefur Playboy tímaritið stöðugt tapað áskrifendum og kaupendum á síðustu árum eftir að klám varð algengara á netinu. Þetta hefur leitt til þess að síðustu fimm ársfjórðungar hafa skilað félaginu tapi. Nú síðast á fyrsta ársfjórðungi ársins nam tapið um 1,8 milljarði kr.

Playboy hefur mætt þessu með niðurskurði og hagræðingaraðgerðum. Þannig er búið að reka um 25% af starfsmönnum tímaritsins á síðustu mánuðum.

Tveir banarískir fjárfestingarsjóðir hafa, að sögn Daily Mail, þegar hafnað tilboði frá Playboy um kaupin en Virgin Media mun vera að skoða málið.

Söluverðið mun eiga að duga fyrir því að Hefner geti haldið áfram að lifa í þeim lúxus sem hann er orðinn vanur. Dóttir hans, Christie, lét af störfum sem forstjóri Playboy í janúar s.l. og hefur nú alfarið hætt afskiptum af félaginu.