Seiðkarl ætlar að binda enda á feril Ronaldo

Seiðkarlinn Pepe er nýtt uppáhald spænskra fjölmiðla en þessi undarlegi maður heldur því fram að hann sé ábyrgur fyrir öllu því neikvæða sem hefur komið fyrir Cristiano Ronaldo.

Pepe segist hafa lagt álög á Ronaldo og það sé ástæðan fyrir því að hann hafi lent í bílslysi og síðan meiðst um daginn.

Það sem meira er þá segir Pepe að kona hafi greitt sér 15 þúsund evrur fyrir að leggja álög á Ronaldo. Hann segir að konan sé fyrrum elskhugi Ronaldos, hún sé vellauðugur erfingi þekktrar fjölskyldu og sé ekki frá Evrópu. Er hann væntanlega að gefa í skyn að það sé Paris Hilton sem hafi ráðið sig í "vinnu".

Pepe komst nú síðast í blöðin þegar hann sagðist ætla að binda enda á feril Ronaldos. Hann neitar samt að gera slíkt hið sama við Lionel Messi.