Nokia gefur 100 hugmyndir

Þeir eru gjafmildir hjá Nokia þessa dagana því nú stendur til að dusta rykið af einum 100 viðskiptahugmyndum sem fyrirtækið notaði ekki og gefa ýmsum minni, nýrri og verr staddari fyrirtækjum landsins þær - algjörlega án endurgjalds.

Esko Aho, aðstoðarforstjóri Nokia og fyrrum forsætisráðherra Finnlands, segir efnahagsumhverfið einmitt vera þannig um þessar mundir að aðrir geti notað það sem sumum nýttist ekki og sennilega eru það orð að sönnu. Hagfræðingar hafa spáð því að samdrátturinn í finnsku efnahagslífi á þessu ári muni nema um fimm prósentum sem sést ef til vill best á því að Nokia tapaði á fyrsta fjórðungi ársins sem hefur ekki gerst síðan þeir voru enn að framleiða gúmmístígvél.

Finnsk fyrirtæki hafa tekið hugmyndagjöfinni fagnandi og hafa 300 fyrirtæki þegar lýst yfir áhuga á að fá hugmynd. En æ sér gjöf til gjalda segir hið fornkveðna og vitanlega sér Nokia fram á að þær hugmyndir sem eitthvað verður úr leiti jafnvel aftur til heimahaganna. Römm er sú taug.