GKG og GK Sveitameistarar í golfi 2009

Karlalið Golfklúbbs Kópavogs og Garðabæjar og kvennalið Golfklúbbs Keilis tryggðu sér sigur í Sveitakeppni Golfsambands Íslands í dag. GKG vann GR í úrslitum karlakeppninnar sem fram fór á Jaðarsvelli á Akureyri en Keilir vann GR í úrslitum kvennakeppninnar sem fram fór á Garðavelli.

Golfklúbbur Kópavogs og Garðabæjar vann 3-2 sigur á Golfkúbbi Reykjavíkur í úrslitaleiknum í Sveitakeppni karla. Birgir Leifur Hafþórsson og Sigmundur Einar Másson unnu sínar viðureignir í tvímenningi og þeir Guðjón H. Hilmarsson og Kjartan D. Kjartansson unnu fjórmenninginn. Golfklúbburinn Kjölur varð í 3. sæti eftir 3-2 sigur á Golfklúbbnum Keili í úrslitaleik um bronsið.

Sveit Íslandsmeistaranna í GKG skipa: Alfreð Brynjar Kristinsson, Birgir Leifur Hafþórsson, Guðjón Henning Hilmarsson, Kjartan Dór Kjartansson, Sigmundur Einar Másson, Sigursteinn Ingvar Rúnarsson, Starkaður Sigurðarson og Úlfar Jónsson. Gunnar Páll Þórisson er liðstjóri.

Golfklúbbur Keilis vann 2-1 sigur á Golfkúbbi Reykjavíkur í úrslitaleiknum í Sveitakeppni kvenna. Signý Arnórsdóttir vann sína viðureign í tvímenningi og þær Ásta Birna Magnúsdóttir og Tinna Jóhannsdóttir unnu fjórmenninginn. Golfklúbburinn Kjölur varð í 3. sæti eftir 2-1 sigur á Golfklúbbnum Oddi í úrslitaleik um bronsið.

Sveit Íslandsmeistaranna í GK skipa: Ásta Birna Magnúsdóttir, Ragna Björk Ólafsdóttir, Signý Arnórsdóttir, Tinna Jóhannsdóttir, Þórdís Geirsdóttir og Kristín Sigurbergsdóttir.