Svíar sækja í sjóði evrópska seðlabankans

Sænski seðlabankinn fær á næstunni þriggja milljarða evra lán frá evrópska seðlabankanum til að koma í veg fyrir að fjármálakreppan grafi sig of djúpt í gjaldeyrisforða bankans. Þetta jafngildir tæpum 539 milljörðum íslenskra króna á gengi dagsins.

Lánið er hluti af gjaldeyrisskiptasamningi sænska seðlabankans við evrópska bankann en samkvæmt honum geta Svíar sótt sér allt að tíu milljarða evra í skiptum fyrir sænskar krónur, að sögn Associated Press í dag.

Sænski seðlabankinn segir í tilkynningu, að skuldbindingar sænskra banka séu að stórum hluta í erlendri mynt og því þurfi seðlabankinn á nægilega traustum gjaldeyrisforða að halda.