Einvígið á Nesinu haldið í þrettánda sinn í dag

Hið árlega Einvígi á Nesinu fer fram á Nesvellinum á Seltjarnarnesinu í dag en mótið er haldið til styrktar langveikum börnum og er DHL fyrirtækið aðalstyrktaraðili mótsins nú eins og í öll skiptin síðan að það var haldið í fyrsta sinn 1997. Tíu kylfingar keppa eftir „shootout“ fyrirkomulagi þar sem leiknar verða níu holur í höggleik fyrir hádegi en eftir hádegi verður níu holu bráðabani.

Heiðar Davíð Bragason úr GR sigraði á mótinu í fyrra en Magnús Lárusson úr Kili í Mosfellsbæ hefur oftast unnið mótið eða þrisvar sinnum. Magnús vann mótið þrjú ár í röð frá 2004 til 2006. Þeir félagar eru báðir með í ár.

Íslandsmeistarinn Ólafur Björn Loftsson úr NK er meðal keppenda en þetta er hans heimavöllur og hefur Ólafur verið mjög nálægt því að vinna mótið undanfarin tvö ár. Aðeins einn heimamaður hefur unnið mótið, Vilhjálmur Ingibergsson árið 1999.

Klukkan 10.00 hefst forkeppni þar sem keppendur leika níu holur. Skor keppenda ræður niðurröðun þeirra fyrir Einvígið eftir hádegi - þ.e. hæsta skor hefur leik.

Klukkan 13.00 hefst sjálft Einvígið. Allir Keppendur leika í sama ráshópi. Einn dettur út á fyrstu holu, annar á þeirri næstu o.s.frv. þar til að uppi stendur sigurvegari á níundu og síðustu holu.

Keppendur á mótinu í ár eru:

Ólafur Björn Loftsson NK - Íslandsmeistari 2009 og Klúbbmeistari NK

Valdís Þóra Jónsdóttir GL - Íslandsmeistari 2009

Heiðar Davíð Bragason GR - vann Einvígið á nesinu 2008

Stefán Már Stefánsson GR - Klúbbmeistari GR 2009

Björgvin Sigurbergsson GK - Klúbbmeistari GK 2009

Alfreð Brynjar Kristinsson GKG - Klúbbmeistari GKG 2009

Magnús Lárusson GKJ - Klúbbmeistari GKJ 2009 og vann Einvígið á nesinu 2004, 2005 og 2006

Guðmundur Rúnar Hallgrímsson GS - Klúbbmeistari GS 2009

Signý Arnórsdóttir GK - 1. sæti á Stigalista GSÍ

Steinn Baugur Gunnarsson NK - Sigurvegari Opna Þjóðhátíðardagsmótsins 2009

DHL á Íslandi styrkir eins og áður sagði mótið og leggur til eina milljón króna til góðgerðarmála. Að þessu sinni er það Umhyggja, Félag til stuðnings langveikum börnum sem að nýtur góðs af.