Albiol til Real Madrid

Real Madrid hefur fest kaup á varnarmanninum Raul Albiol frá Valencia en félagið staðfesti það nú í dag.

Albiol hefur verið að leika með spænska landsliðinu í Álfukeppninni í Suður-Afríku en Spánverjar töpuðu í gær fyrir Bandaríkjunum, 2-0, í undanúrslitum.

Hann mun því gangast undir læknisskoðun í næstu viku og eftir það verður hann formlega kynntur til sögunnar sem leikmaður Real Madrid.

Albiol er 23 ára gamall miðvörður og er fæddur í nágrenni Valencia. Hann hefur alla tíð leikið með Valencia og vann sér sæti í aðalliðinu eftir að hann var búinn að jafna sig á áverkum sem hann hlaut í bílslysi árið 2004.