Milan ætlar ekki að hækka tilboð sitt í Beckham

Adriano Galliani varaforseti AC Milan segir félagið ekki ætla að hækka kauptilboð sitt í enska landsliðsmanninn David Beckham hjá LA Galaxy.

Forráðamenn Galaxy eiga von á að fá kappann aftur til Bandaríkjanna þegar lánssamningi hans við ítalska félagið lýkur, en þeir eru fjarri því sáttir við þá upphæð sem Milan hefur boðist til að greiða fyrir hann.

"Ég vil ekki valda deilum, því við erum þakklátir Galaxy fyrir að lána okkur leikmanninn. Við viljum hinsvegar ekki hækka tilboð okkar. Ég hef reynslu af því að kaupa leikmenn og geri mér því grein fyrir því hvað þeir eiga að kosta. Það borgar sig ekki fyrir okkur að eyða meiru í hann," sagði Galliani í samtali við Gazzetta dello Sport.