Við eigum töluvert inni frá síðasta leik

"Við erum fullir tilhlökkunar fyrir þennan risaleik og ég á ekki trú á öðru en að verði uppselt," sagði Friðrik Ragnarsson þjálfari Grindavíkur í samtali við Vísi í dag þegar hann var spurður út í stórslag KR og Grindavíkur í undanúrslitum bikarkeppninnar á morgun.

KR og Grindavík hafa verið í algjörum sérflokki í deildinni í vetur. Liðin hafa mæst tvisvar sinnum, í Powerade-bikarnum og í deildinni, og þar hafði KR betur í bæði skiptin í æsilegum spennuleikjum.

KR vann úrslitaleikinn í Powerade bikarnum með skoti Jason Dourisseau á lokasekúndunni í Laugardalshöll og vesturbæingar höfðu líka nauman tveggja stiga sigur í fyrri leik liðanna í deildinni sem fram fór í DHL-höllinni í Frostaskjóli.

"Þetta verður háspennuleikur og mikil gæði. Bæði lið eru mjög vel mönnuð og það er alveg pottþétt að þetta verður vel spilaður og skemmtilegur leikur. Það er allt of mikið af hæfileikamönnum á gólfinu til að svo verði ekki," sagði Friðrik.

Grindvíkingar hljóta að vera komnir með blóðbragð í munninn eftir tvö sár töp gegn þeim svarthvítu.

"Við eigum töluvert inni frá þessum leik sem við töpuðum í deildinni. Þar var Arnar Freyr (Jónsson) í leikbanni og Helgi Jónas (Guðfinnsson) veikur, svo við vorum mjög laskaðir í leikstjórnandastöðunni. Nú eru þeir báðir klárir og svo bætist Nick Bradford við þetta hjá okkur," sagði Friðrik.

Bradford, sem áður lék með Keflavík, hefur spilað tvo leiki með Grindavík síðan hann kom til landsins og er strax farinn að setja mark sitt á liðið.

"Hann hjálpar okkur mikið með alhliðaleik sínum, ekki síst í varnarleiknum. Hann er mikill liðsspilari og ég sagði honum að mér væri alveg sama hvað hann skoraði mikið, ef hann bara hjálpar okkur að gera liðið betra. Hann er mikill töffari á velli," sagði Friðrik.

Leikur KR og Grindavíkur hefst klukkan 16 á morgun og líklega er rétt að skora á fólk að mæta snemma því reikna má með troðfullu húsi á þennan stærsta leik vetrarins til þessa.