Cultural lítil fyrirstaða fyrir Barcelona

Barcelona komst örugglega áfram í 5. umferð spænska konungsbikarsins í kvöld eftir 5-0 sigur gegn smáliðinu Cultural í seinni leik liðanna í keppninni en Barcelona vann einvígið samanlagt 7-0.

Leikmenn Cultural náðu reyndar að standa aðeins í heimamönnum á Nývangi framan af leik og staðan var enn markalaus í hálfleik.

Snemma í síðari hálfleik opnuðust hins vegar flóðgáttir og Börsungar gengu á lagið. Bojan Krkic skoraði tvö mörk og Pedro, Xavi og Lionel Messi sitt markið hver.