Beckham: Ancelotti á það til að beita hárblæstrinum

Carlo Ancelotti þjálfari AC Milan hefur mikið verið orðaður við stjórastöðuna hjá Chelsea í sumar. David Beckham leikur undir hans stjórn hjá Milan og segir Ítalann ekkert lamb að leika sér við.

Beckham var einn þeirra sem átti það til að verða fyrir "hárblásaranum" hjá Sir Alex Ferguson á sínum tíma, en það er tilvísun í það þegar stjórinn öskrar svo hátt á leikmenn sína að hárin rísa á höfðinu á þeim.

Ancelotti er honum enginn eftirbátur ef marka má enska landsliðsmanninn.

"Ancelotti er með mikla nærveru eins og allir bestu stjórarnir. Hann er frekar rólegur og stilltur náungi, en hann á sér aðra hlið líka. Ég hef aldrei orðið fyrir hárblæstri frá honum, en ég hef séð hann beita honum. Trúið mér - þegar Ancelotti vill láta hlusta á sig - þá gerir hann það án nokkurs múðurs," sagði Beckham.