Valencia ítrekar að David Silva sé ekki til sölu

Spænski landsliðsmaðurinn David Silva hjá Valencia hefur verið sterklega orðaður við Manchester United og Liverpool í sumar en Mauel Llorente forseti spænska félagsins ítrekar að leikmaðurinn sé ekki til sölu.

„Málið er ósköp einfalt. Við viljum ekki selja leikmanninn og hann er ánægður hjá félaginu og sú afstaða mun ekkert breytast áður en félagsskiptaglugganum lokar. Það skiptir því engu máli hvort við séum búnir að fá kauptilboð eða hvort við komum til með að fá kauptilboð í leikmanninn," segir Llorente.

Valencia hefur þegar staðið af sér áhuga stórliðanna Barcelona og Real Madrid sem reyndu að fá sóknarmanninn David Villa í sumar og því verður að teljast líklegt að Llorente geti staðið við orð sín varðandi Silva.