Milan og Barcelona í viðræðum um Zlatan

Svo gæti farið að Zlatan Ibrahimovic sé aftur á leið til Ítalíu þrátt fyrir allt eftir aðeins eitt ár í herbúðum Barcelona á Spáni.

Zlatan kom til Barcelona frá Inter síðasta sumar og hefur ítrekað verið sagður aftur á leið frá Barcelona. Því hefur hann ávallt neitað og staðhæft að hann yrði áfram á Spáni.

En nú segir Adriano Galliani, varaforseti AC Milan, að félagið eigi í viðræðum við Barcelona um kaup á Zlatan.

Galliani sagði á heimasíðu AC Milan að viðræðurnar væru afar flóknar og erfiðar og kaupin afar dýr.

„Það er vilji Barcelona að selja leikmanninn og leikmaðurinn sjálfur er sama sinnis," sagði Galliani. „En það er mikið af peningum í spilinu og það er erfið hindrun að yfirstíga."

„Ég mun gera allt sem í mínu valdi stendur til að fá þennan mikla meistara til Milan. En það er afar erfitt."