Eðlilegt fólk er það skrítnasta af öllu

Stórleikarinn Johnny Depp er á forsíðu nýjasta heftis tímaritsins Vanity Fair og fjallar þar meðal annars um hlutverk sitt í kvikmyndinni The Tourist, en þar leikur hann stærðfræðing sem lendir í ýmsum ævintýrum.

„Ég hef alltaf heillast af fólki sem þykir alveg eðlilegt, því mér finnst það fólk skrítnast af öllum," sagði leikarinn, sem hingað til hefur verið þekktastur fyrir að leika ýmsa kynlega kvisti.

Depp segist halda mikið upp á persónuna Jack Sparrow, úr kvikmyndinni Pirates of the Caribbean, en segir yfirmenn Disney-samsteypunnar ekki hafa deilt þeirri hrifningu með honum.

„Þau þoldu hann ekki. Einfaldlega þoldu hann ekki. Einn yfirmannanna taldi að Jack myndi eyðileggja myndina.

„Hvað er að honum, er hann svona einfaldur? Er hann drukkinn? Er hann samkynhneigður?" spurði hún mig og ég svaraði henni: „Vissirðu ekki að allir karakterar mínir eru samkynhneigðir?" Þetta svar gerði hana bara taugaóstyrkari," sagði Depp.