Logi: Menn voru farnir að spara kraftana fyrir Evrópuleikinn

Logi Ólafsson, þjálfari KR, var sáttur með leik liðsins í 90 mínútur í kvöld. KR var 3-0 yfir gegn Þrótti en fékk á sig tvö mörk í lokin og var heppið að fá það þriðja ekki á sig. "Ég var sáttur við leikinn fyrir utan vesenið á okkur undir lokin. Það skrifast á kæruleysi af okkar hálfu. Menn tönnlast oft á því að þriðja markið skipti öllu máli og eigi að klára leiki en það þýðir ekki það að menn eigi að hætta að spila fótbolta." "Mér sýndist menn vera að spara kraftana til fimmtudagsins, það virkaði þannig á mig. Það má segja að við höfum spilað vel í 90 mínútur og við áttum að vera búnir að nýta færin okkar. Þá hefði uppbótartíminn ekki skipt neinu máli." "Við verðum að vera mun ákveðnari fyrir framan markið gegn Karpaty, við fáum ekki jafn mörg marktækifæri gegn þeim," sagði Logi.