Átta mörk hjá Real Madrid í lokaleik ársins

Cristiano Ronaldo og Karim Benzema skoruðu báðir þrennu í kvöld þegar Real Madrid vann 8-0 stórsigur á Levante í fyrri leik liðanna í sextán liða úrslitum spænska Konungsbikarsins. Barcelona gerði markalaust jafntefli við Atletico Bilbao í sömu keppni í gær.

Karim Benzema skoraði fyrsta mark leiksins á 6. mínútu, Mesut Ozil skoraði annað markið eftir undirbúning frá Cristiano Ronaldo á 10. mínútu og Benzema skoraði síðan sitt annað mark á 31. mínútu.

Benzema lagði síðan upp fjórða markið fyrir Ronaldo og þannig var staðan í hálfleik. Benzema skoraði fimmta markið á 69. mínútu og Ronaldo innsiglaði síðan sína þrennu með mörkum á 72. og 74. mínútu. Varamaðurinn Pedro Leon skoraði síðan áttunda markið á 89. mínútu.

Real Madrid hefur ekki unnið spænska Konungsbikarinn síðan 1993 en eftir þennan stórsigur ætti liðið að verða gulltryggt inn í næstu umferð. Seinni leikurinn fer fram á heimavelli Levante 5. janúar næstkomandi.