Umboðsmaður Diego Milito: Hann verður áfram hjá Inter

Umboðsmaður Diego Milito segir að argentínski framherjinn verði áfram hjá Internazionale Milan þrátt fyrir orðróm um að hann sé á leiðinni til Real Madrid með Jose Mourinho.

Milito talaði um það eftir frábæran leik sinn í úrslitaleik Meistaradeildinni að hann væri ekki viss um að spila áfram með Inter því hann hefði fengið nokkur áhugaverð tilboð.

„Milito verður hundrað prósent áfram hjá Inter. Hann er með samning næstu þrjú árin og á meðan Inter vill halda honum þá verður hann áfram. Ég hef talað við klúbbinn og mun halda áfram að tala við klúbbinn næstu vikur," sagði Fernando Hidalgo, umboðsmaður Diego Milito, við Sky Sports Italia.

Diego Milito skoraði 30 mörk í 51 leik fyrir Inter á sínu fyrsta tímabili í Milanó þar af skoraði hann 6 mörk í 11 leikjum í Meistaradeildinni. Hann skoraði bæði mörkin í úrslitaleik Meistaradeildarinnar og var valinn maður leiksins.