Pekanbaka með búrbonrjóma

Nanna Rögnvaldsdóttir matgæðingur eldaði fyrir okkur dýrindis pekanböku með búrbonrjóma.

Pekanbaka

1 skammtur bökudeig, heimatilbúið eða keypt

90 g smjör, bráðið

100 g púðursykur

75 g ljóst síróp

2 egg

200 g pekanhnetur

Hitaðu ofninn í 180°C. Flettu deigið fremur þunnt út, leggðu það yfir meðalstórt bökuform og þrýstu því niður og upp með brúnum. Snyrtu kantana. Leggðu bökunarpappír yfir deigið og láttu hann standa vel út fyrir. Settu eitthvert farg í formið, og bakaðu deigskelina í um 10 mínútur. 

Bræddu á meðan smjörið og hrærðu púðursykri, sírópi og eggjum saman við. Taktu bökuskelina út, fjarlægðu pappírinn og fargið, dreifðu hnetunum í skelina og helltu sírópsblöndunni yfir. Lækkaðu hitann í 160°C og bakaðu bökuna í 20-25 mínútur, eða þar til fyllingin er farin að stífna. Berðu hana fram með þeyttum rjóma, e.t.v. bragðbættum, eða vanilluís.

Búrbonrjómi

250 ml rjómi

2 msk. púðursykur

1 tsk. búrbonviskí, eða ½ tsk. vanilluessens eða annað bragðefni



Léttþeyttu rjómann, bættu púðursykri og viskíi út í og þeyttu áfram þar til rjóminn er stífþeyttur.